Errenteriak gizarte-bazterkeriari aurre egiteko koordinazioa indartu du

Urtebete bete da erakundeek eta gizarte-erakundeek elkarrekin lan egin dutela, kaleetan gero eta agerikoagoa den errealitateari erantzuteko.

Errenteriak gaur goizean aurkeztu du komunikabideen aurrean bazterkeria koordinatzeko mahaiaren urtebeteko lanaren balantzea. Gizarte bazterkeria jasaten duten pertsonen egoerari erantzun integrala emateko Udalak bultzatutako ekimena da.

Mahai horretan udal Gizarte Zerbitzuek, Udaltzaingoak, Belabaratz aterpetxeak, Arrats Elkarteak, Emaus Gizarte Fundazioak, Gipuzkoako Foru Aldundiko SEFAC zerbitzuak eta KAM (laguntza psikologikoa) eta EKUM (osasun laguntza) unitateek parte hartzen dute.

Gizarte-bazterkeria gero eta arazo larriagoa da Gipuzkoan, etxegabetasuna baita horren adierazpenik agerikoena. Egoera horretan dauden pertsonak sare sozial eta asistentzialetatik kanpo geratu ohi dira, eta horrek larriagotu egiten du haien zaurgarritasuna. Errealitate horri aurre egiteko, mahaia hilero biltzen da, kaleko egoerari buruzko informazio eguneratua partekatzeko eta ostatu eta akonpainamendu sozialeko baliabideak koordinatzeko.

Emaus Gizarte Fundazioak lan nabarmena egiten du elkarlan horretan, aldi baterako udal-bizitokien koordinazioa bere gain hartuz eta kaleko hezkuntza- eta akonpainamendu-lanak eginez. Haien inplikazioari esker, zuzeneko loturak ezartzen dira bazterkeria jasaten duten pertsonekin, eta kasu bakoitzera gehiago egokitzen diren esku-hartze ibilbideak bultzatzen dira.

Tokiko estrategiak udalaren inbertsio esanguratsua du: 2,8 milioi euro inguru urtean, aurrekontuaren % 4 baino gehiago. Errenteriak aldi baterako 39 ostatu-plaza ditu gaur egun, Oarsoaldea eskualdeko beharrei erantzuteko.
2024an 45 esku-hartze sozioedukatibo egin ziren, eta Belabaratz aterpetxeak 309 pertsona artatu zituen, batez beste %96ko okupazioarekin.

Horrela, Errenteriak eta udalerriko gizarte-erakundeek aurrera egin dute laguntza-sare sendo eta inklusiboago bat eraikitzeko bidean.